Davao City – Adunay mga seryosong pagduha-duha si Prof. Clarita Carlos sa political science department sa University of the Philippines ug executive director sa think tank group nga Stratsearch Foundation, Inc. mahitungod sa hugon-hugon nga negosasyon alang sa pag-uli sa pipila ka mga bahandi sa pamilyang Marcos balik sa panudlanan sa nasud.
Sa radio social commentary program nga ‘Straight to the Point’ sa topikong ‘Marcos Gold,’ gipa-ambit ni Carlos ang iyang panglantaw sa masalimuot nga proseso sa pagkab-ot sa maong kasabutan ug katuyuan.
Matud ni Carlos, daghan pa kita’g angayang masayran sa Marcos wealth issue pananglit ang ensaktong kantidad sa bahandi sa Marcoses haron mamahimong lig-on ang basihan sa gika-anunsyong negosasyon alang sa pagpauli sa pipila ka mga gold bars ngadto sa kaban sa nasud.
Hinoon, malaumon ang political science professor nga kun mulahutay na unya ang proseso ug kun molampos ang maong transaksyon, hayan makabenepisyo unya ang tawo ilabi na kun garantiyahan sa estado ang hustong pag-utilisar niini.
Una niini, hugot nagpasidaan si Pres. Rodrigo Duterte nga malisud ma-realisar ang maong panagsabot-sabot kun walay ‘immunity from criminal suit’ nga andam itugyan ang gobyerno ngadto sa pamilyang Marcos bugti sa iuli unya nga mga ‘ill-gotten wealth.’
Kasamang June Duterte
