Sarangani Province—Narekober sa tropa sa Kapulisan ug sa Militar ang kampo ug marijuana Plantation nga gituohang iyaha sa NPA sa may nabukid nga bahin nga sakop sa Barangay Nalus, Kiamba, Sarangani Province atol sa ilang gihimong operasyon , adlawng Domingo.
Gipangunahan sa RPSB 12, Kiamba Municipal Police Station , Sarangani PMFC , Sarangani PIB/PDEU inabagan sa PNP SAF ug Bravo Company sa 27 IB , Philippine Army sa pakig-alayon sa PDEA-12 ang anti-illegal Drug Operation batok sa mga miyembro sa NPA nga responsabli matud pa sa pagpananum ug marijuana sa maong lugar.
Gisugdan ang operasyon alas 6:15 sa buntag hangtod na sa alas 7:15 sa gabie kung asa target sa tropa sa gobyerno ang grupo ni Gorio/Toto Navarro, Dandan Navarro, ug mga kaubanan.
Nakaengkwentro pa sa awtoridad ang mga rebelde sa area sa Sitio, Tabutong, Brgy. Nalus nga miluntad hangtod sa 15 minutos, apan miatras ang mga rebeldi human wala makaatraka sa pwersa sa kapulisan ug militar.
Walay natalang angol sa tropa sa gobyerno, samtang wala usab masayran kung may namatay o may naangol sa grupo sa NPA.
Narekober gikan sa kampo sa NPA ang (1) ka unit .30 cal. carbine rifle;
(2) ka units cal. 38 pistol,mga bala; (1) ka bandolier nga may walo ka mga magazines; (81) ka buhing bala sa Cal 30; pagkaon, subersibong dukumento ug usa ka NPA Flag.
Ang narekober nga kampo sa NPA gituohang ilang training camp. Samtang gihimo nag hot pursuit operation batok sa mga suspek, nakahigayon nga nakaplagan ang Marijuana plantation apan napang-ibot na ang mga tanum nga marijuana.
Bugtong nahibilin na lamang kadtong mga nangatagak nga dahon, sanga ug liso sa gituohang marijuana.
Ang mga narekober nga ebidensya giturn-over na ngadto sa kiamba MPS alang sa saktong disposisyon.
