Masobra 200 ka mga pamilya apektado sang rido sa Palimbang Sultan Kudarat, 50 ka mga pamilya halin sa mga Sitios sang Brgy. Ned. nagbakwit.

Nagalab-ot sa 205 ka mga pamilya ang apektado sang rido sa Barangay Bagtok kag Bulul sa banwa sang Palimbang, Sultan Kudarat sang Abril 19 base sa report nga nabaton sang Municipal Disaster Risk Reduction and Management Office sang Lake Sebu.
Apang suno kay South Cotabato Provincial Disaster Risk Reduction ang Management Officer (PDRRMO) Mila Rivera nagbakwit ang yara sa 50 ka mga pamilya halin sa Sitio Kumilap, Mulmul kag Kasayan sang Barangay Ned, Lake Sebu nga boundary sang Palimbang, Sultan Kudarat tungod sa kahadlok.
Sa subong nagatinir ang nasambit nga mga residente sa evacuation center sa proper Ned kag padayon ang assessment sang MDRRMO Lake Sebu.
May-angot , sini sa Abril 24, kadungan sa geohazard assessment sang PDRRMO kag Mines and Geosciences Bureau (MGB) sa mga sink holes sa Brgy.Ned, suno kay Maam Rivera ila na man lang nga ilakip ang pagsikyar sa sitwasyon sang mga bakwit sa amo nga lugar.
Ginpahayag niya man nga i-coordinate nila sa DSWD kon ano ang mahatag nga ayuda sa mga bakwit, matapos nga sa bahin sang LGU`s indi sila basta makahatag sang ayuda tungod sa implementasyon sang election ban.