BACOLOD CITY – Nagalab-ot sa ₱1,032,000 nga balur sang suspected shabu ang narecover sang mga kapulisan sa ginpatigayon nga drug buybust operation kagab-i sa Rio Villa Pension House, Barangay Singcang Airport.
Ang suspetsado ang ginkilala kay Jomarie Tapalia, 50 anyos residente sang Purok San Roque, Barangay Handumanan.
Si Talapia ang ginakabig isa ka street level target (SLT) sang mga otoridad.
Suno kay P/Chief Insp. Ruel Culanag, hepe sang Police Station 8, makaligad ang halos isa ka semana nga pagpanilag sa suspetsado, kagab-i lamang nila ini natikma ang suspek sa diin narecover sa iya nga 17 ka sachet sang suspected shabu.
Narecover man ang isa ka bundle sang transparent plastic nga ginagamit sa repacking sang iligal nga druga, duha ka tag ₱500 peso bills , duha ka ₱100 pesos bills, isa ka unit sang cellphone kag isa ka gunting.
Kaso nga paglapas sa section 5 kag section 11 sang R.A. 9165 ukon Comprehensive Dangerous Drugs Act of 2002 ang ipasaka kontra sa suspetsado.
