Nadiskobrehan nga napaig patay ang master baker sa L&L Bakery nga nailang si Edwin “tata” Cael, 42 anyos nga taga-Zone 5, Riverside Puerto ning dakbayan atol sa gihimong clearing operation sa mga bombero sa Bureau of Fire Protection kagahapong adlawa.
Matud pa nga wala nagtuo ang mga bombero nga adunay nasunog sa insidente tungod na usab kay migawas na sa nasunog nga bakery si Tata apan wala kini nabantayan nga mibalik kini sa sulod aron motabang sa pagsabya og tubig.
Gituhoan usab ni Kagawad Darisa Heludo ang tag-iya sa bakery nga na-suffocate ang biktima sa bagang aso sa sulod hinungdan wala na kini makagawas hangtod nga nasunog kini sa kusog nga pag-ulbo sa kalayo.
Nasayran nga mga alas-4:30 na sa hapon dihang nakit-an ang patayng lawas sa biktima sulod sa banyo pinaagi sa mga bata nga nangoykoy og mga scrap sa maong dapit.
Gawas niini, mikabat usab sa 66 ka pamilya o home owners, trese ka renters ug 244 ka indibidwal ang naapektohan sa sunog, kinsa temporaryong misilong sa Puerto covered court ning dakbayan.
