Davao City – Di masukod ang kalagot sa mga paryente sa usa ka menor de edad nga biktima kinsa gidunggab-patay sa Sunrise Village, Matina, Davao City kagahapong adlawa, July 17, 2019.
Sa interview sa DXDC RMN Davao kang alyas Jim, amahan sa biktimang si alyas James, 17 anyos kinsa kauban sa napatay sa magsuong Abitono, kasakit ug kasuko ang iyang gibati sa gidangatan sa iyang kamaguwangan nga anak nga aduna pay nabiling duha ka manghod.
“Gusto unta nako makabalos ko… paggawas niya (suspek) sa prisuhan,” segun sa amahan.
Gani nanghinaut kini nga di na makagawas ang suspek nga si Daryl Aguilar ug mamatay nalang sa prisuhan apan di pa kini makaingon og mapasaylo ba niini sa ngadto-ngadto ang nagpatay sa iyang anak.
“Dili dali mapasaylo ang nagpatay,” dugang sa amahan.
Samtang mipagawas usab sa iyang gibati si alyas Francis, uyuan sa biktima.
“Kung ako magdesisyon, di na paagion sa prisuhan, di na nako paulion og buhi kung naa lang sakong duol… mao ra nay sakit kay muagi tag due process,” segun sa uyuan.
Kahinumduman nga migawas sa imbestigasyon nga giselosan matud pa sa suspek ang biktimang 17 anyos kinsa barkada ni Jesybell Tecson Abitona, live-in partner sa suspek apan di mutuo ang kabanay niini.
“Kana ng bata, binabane man na siya… balik-balik na sa boarding house ni Jesy…Kung lalake ka, di ka pwede magselos ana kay makita man sa iyang aksyon,” dugang pa sa uyuan.
Sa karon, gihaya na ang tulo ka mga biktima sa Anghel Funeral Homes samtang ang suspek gipasakahan na matud pa og kasong murder.
RadyoMaN Renz Barbarona
