Nakapili na pag-usab si Mayor Oscar Moreno sa bag-ong police official nga iyang ipuli sa gibiya-an nga katungdanan ni anhing City Police Director Nelson Aganon.
Matud ni Moreno nga niadtong Miyerkules, iya nang napadala ang iyang sulat alang ni Police Brig. General Rafael Santiago, ang Regional Director sa Camp Alagar.
Gibutyag ni Moreno nga sa iyang sulat nga gipadala ni General Santiago, iyang ginganlan ang police official nga iyang napili aron iyang ipuli sa namatay nga si Aganon.
Apan iyang radio interview sa dxCC, kagabie, wala pa ibutyag sa mayor ang ngalan sa police colonel nga iyang himoon nga City Police Director sa Cagayan de Oro.
Matud ni Moreno nga iyang ibutyag ang ngalan sa police official nga iyang napili kon duna nay pormal nga appointment niini gikan sa Camp Crame.
“Ako lang ang magpili, pero ang Camp Crame maoy mohatag sa formal appointment sa sunod nga chief of police sa Cagayan de Oro.” matud ni Moreno.
Gidugang ni Mayor Moreno nga bisan siya ang nagpili apan ang iyang gusto nga si General Santiago gayud ang mag-install sa sunod nga chief of police ning syudad kon ang iyang police nga napili duna nay appointment gikan sa Camp Crame.
