General Santos City–Gi-angkon ni Gensan City Mayor Ronnel Rivera nga walay travel history ang usa ka 62 anyos nga babaye nga taga Barangay Bula ning dakbayan sa Gensan nga una ng nagpositibo sa covid-19.
Sumala sa Mayor nga nagpahigayon na ug halapad nga contact tracing ang IATF ug padayon pa ang ginahimong pagsuta sa mga tawong nakahimamat niini.
Gina-imbestigahan na usab sa mga eksperto ang sitwasyon niini.
Sa karon, gipa-ilalom na sa localized lockdown ang zone 7 particular na ang compound sa pamilya sa nahisgutan aron masegurong walay mugawas-sulod.
Pagpaklaro ni Mayor Rivera nga dili pa niya masulti nga adunay local transmission sa dakbayan gumikan padayon pa ang ginahimongimbestigasyon kung asa niini nakuha ang maong virus.
Ayha matud pa nigawas ang resulta sa RT-PCR test sa nahisgutang pasyente, nauna ng nagpahigayon ug contact tracing ang LGU human kining magpositbo sa rapid test.
Sa karon, nagpabiling on top ang mga opisyal sa Barangay Bula sa sitwasyon ug nahimo na matud pang epektibo ang strict border control sa dakbayan.
Dugang pamahayag ni Mayor Rivera nga sa karon dili pa niya masulti nga dili dapat magpanic ang publiko apan siya nanawagan nga kinahanglang tumanon ang health protocol.
Sumala kang Mayor Rivera nga ang ilahang ginahimo sa karon mao ang pro-active measures aron nga mapugngan ang posibleng pagkatag sa virus kung aduna may local transmission sa Gensan.
Samtang ang paghangyo nga mubalik sa lockdown ang Gensan ang magdepende sa resulta sa ginahimo gimbestigasyon sa kaso sa 62 anyos nga babaye.(LVR)
