General Santos City— Ginarespeto ni Gensan City Mayor Ronnel Rivera ang desisyon sa mga tag-as nga opisyal sa kapulisan nga pulihan isip City Director sa Gensan City Police Office si Police Senior Superintendent Romeo Ruel Berango.
Pamahayag niya nga sa paglingkod ni Police Senior Superintendent Raul Supiter, iyahang gilauman nga malampasan o matupngan niini ang mga nahimo ni Col. Berango sulod sa walo ka bulan.
Iyaha man usab gipaniguro ang suporta sa lokal nga panggamhanan ngadto sa gensan city police office.
Dugang pamahayag ni Mayor Rivera nga wala siya’y nakit-an rason aron nga pulihan si Col. Berango kung asa wala matud pa sila nagka-istorya sa nasangpit nga opisyal ayha gihimo ang turn over of command sa Police Regional Office 12.
Dako man usab ang pagtuo sa mayor nga promosyon ang hinungdan sa kalit nga paghulip kang Col. Berango o dili ba kaha aduna gyuy re-shuffling sa mga opisyal sa kapulisan.
Sa karon, nakatakda matud pa siyang makig-istorya kang General Marcelo Morales, Regional Director sa aron masayran ang hinungdan sa kalit nga pagpuli kang Col. Berango.
Kalabot niini, gibutyag ni Mayor Rivera nga magpabilin ang iyahang direktiba ngadto kang Col. Supiter nga sulbaron ang mga kaso sa patay sa dakbayan ug uban pang kriminalidad.
