HINIGARAN, NEGROS OCCIDENTAL – Prangka nga ginpahayag ni Hinigaran Mayor Jose Nadie Arceo nga nabudlayan siya sa kampanya batuk sa illegal drugs bangud nga ang iya chief of police wala naga-cooperate.
Ginadeny ni Mayor Arceo ang report sang police nga matawhay ang iya banwa kag hilway na sa illegal drugs ang Hinigaran. Amu man sina ang report sang Barangay Drug and Abuse Council (BADAC) sang Barangay 4, paagi kay Kapitan Jensy Jaresco nga wala na sang drug lord sang iya barangay. Ang Barangay 4, amu naman ang lugar nga gina-istaran sang pamilya Ramos, nga gintudlo drug personalities sa banwa.
Suno sa alkalde, indi mapatihan ang report sang Hinigaran PNP nga wala na sang drug lord sa iya nga lugar.
Sa interview sang dyHB ginpahayag ni Mayor Arceo nga 90% sang banwa ang apektado sa gihapon sang druga, sa presensya sang drug lord nga si Jessie Ramos kag bata sini nga una na nagsurender sa Campo Crame.
Sa pihak nga bahin, gintawag naman ni Mayor Arceo nga bulag kag bungol ang police kag Philippine Drug Enforcement Agency (PDEA) bangod apisar nga ginapalab-ot na niya ang sitwasyon, wala sang aksyon ang mga ini.
Pahayag sang mayor nga wala nagapatigayon sang seryoso nga operation ang Hinigaran PNP agud nga madakup ang kilala nga druglord sa ila banwa.
Bangud sini, nag request na si Arceo sang bag-o nga chief of police sang Hinigaran PNP bangod indi siya kontento sa performance PSInsp. Lawrence Bathan.
