iFM Laoag – Natay ti maysa a babai iti ili ti Piddig kalpasan a pinaltupaltugan dagiti riding in tandem iti Sitio Malapinanao, Brgy. 22 Boyboy, Piddig, Ilocos Norte.
Nabigbig ti biktima a ni Mrs. Fredalin Agustin, agtawen ti limapulo ket dua, maysa a balo ken residente iti met laeng nadakamat a lugar.
Segun kenni Brgy. Chairwoman Imelda Juan, kapitan iti baranggay, ti biktima ket napan iti taltalon nu sadinno iti ilalasatna ti kalsada a nagnaanna ket kellaat nga adda dagiti dua a nakamotorsiklo a maipagarop nangpaltupaltug.
Inbatadna pay a posible nga iti motibo dagiti nangpapatay ket iti maatap ken mapabpabasol a mannamay ti biktima ngem saanna a patien daytoy gapuna ta saan met a naringgor daytoy a damag iti baranggay.
Innayun ti kapitan a kapatpatay laeng ti asawana idi bulan ti Uktubre itay napalabas a tawen isu a maymaysana nga agisaksakad ti panagbiag dagiti annakna a tallo. Basar met ti panagimbestigar iti PNP Piddig, napaltugan ti ulo, tengnged ken saka ti biktima iti kalibre kuarenta y singko a nakarekobreanda pay dagiti bala iti scene of the crime.
Innayunna ti PNP a dead on the spot ti biktima gapo iti nakana a sinagabana idin to nga agtultuloy met paylaeng ti imbestigasion nu ana pay dagiti posible a motibo ken rason ti pannakapaltupaltug ti biktima. (Joe Anne Agustin, RMN News)
