Davao City – Gikumpirma sa Kapalong Municipal Disaster Risk Reduction and Management Office (MDRRMO) nga walay foul play ang pagkalumos-patay sa duha ka mga bata sa Kapalong, Davao del Norte. Sa interview sa DXDC RMN Davao kang Jaiasent Cabactulan, Operations In-Charge sa Kapalong MDRRMO, iyang gikumpirma nga nakit-an na sa Libuganon River ang 9 anyos nga batang babae alas 8:25 sa kagahapon sa buntag, November 23, 2023 nga nalumos ug naanod niadtong November 21, 2023. Pipila lang kini ka minutos human nga nakit-an alas 8:22 sa buntag ang usa ka 15 anyos nga lalaki nga nalumos sa Sampao River niadtong November 22, 2023. Matud ni Cabactulan nga nakaplagan ang mga biktima sa managlahing lugar daplin sa sapa ug sa imbestigasyon, walay foul play ang insidente. Pahimangno sa DRRMO official sa mga ginikanan nga kanunay nga bantayan ug i-monitor ang aktibidad sa mga anak aron nga malikayan ang susamang insidente. “Subayon lang gyud nato’g trace, follow up ang atong mga estudyante nga maka-assure nga naa sa eskwelahan. Atoa gyong subayon kung (asa) ilang locations. Dili gyud unta magligo-ligo og sapa nga sila sila ra nga walay supervision sa dagko,” pahimangno ni Cabactulan. Samtang gipakusgan pa karon sa Local Government Unit (LGU) Kapalong ang ilang Drowning Prevention Program uban ang mga barangay aron nga mapakusgan ang kampanya sa paglikay sa insidenteng pagkalumos ilabi na sa mga kabataan. RadyoMaN Kirby Manzon tags: DXDC 621 RMN Davao
Facebook Comments
