Indi pa madeklarar nga may-yara na sang outbreak sang balatian nga tipdas dire sa probinsya sang South Cotabato tungod panubo na ang marekord nga panibag-o nga kaso sang Provincial Epidemiology Surveillance unit kada semana.
Ini ang pagpaklaro nga pamahayag ni Dr. Rogelio Atudido Jr. Provincial Health Officer sang South Cotabato.
Samtang base sa datos nga iya ginpresentar sa ginpatigayon nga Provincial Disaster Risk Reduction and Management Council meeting sang nagligad nga semana yara na sa 131 ang kaso sang tipdas dire sa probinsya kag nagapabilin nga isa ang patay sa nasambit nga balatian.
Sa nasambit nga datos ang Polomolok ang may-yara na sang 67 ka kaso, Koronadal City -21, Banga -10 , Norala – 9, Tupi -6, Surallah – 5, Lake Sebu -4, T`boli kag Tampakan may tig -3,Tantangan -2 kag Sto. Niño -1.
Nahibaluan nga sa datos sang Department of Health 12 ang South Cotabato ang may mataas nga kaso sang tipdas sa rehiyon.
Ginkumpirmar man niya nga sa subong nagapadayon ang measles vaccination sa mga kabataan edad anum ka bulang tubtob lima ka tuig kag pag-edukar sa katawhan agud malikawan ang nasambit nga balatian.
