BACOLOD CITY – Desidido nga magpasaka sang kaso ang iloy sang isa ka menor de edad nga bata nga lalaki nga ginaalegar ginkastigo sang 6 ka mga barangay tanod nga ginaalegar hubog sang nagligad nga Sabado sang gab-i, Agosto 25, 2018 sa Brgy. 16, Bacolod City.
Ang biktima, isa ka 16 anyos nga bata nga lalaki, pumuluyo sang Purok Kingfisher, Brgy. 16, Bacolod City.
Nag-angkon sang patal nga igo sa iya ulo ang biktima matapos ini ginlampusan sang baseball bat sa ulo sang amo nga tanod kag padayon karon nga confined sa Corazon Locsin Montelibano Memorial Regional Hospital.
Isa sa anum ka mga tanod nga nakilala kay Michael Rosales ang detained na karon sa custodial facility sang Police Station 1.
Suno sa iloy sang biktima (ginahinago ang pangalan) nga desidido siya nga pasakaan sang kaso si Rosales kag ang 5 lima ka iban pa nga nakilala nga sanday Ben Bejemino, Christopher Abelana, Mark Anthony Bico, Johnmar Ronzales kag Michael Jamandre.
Sandig sa imbestigasyon nga sadtong Sabado sang gab-i, nagasinadya-sadya ang biktima upod ang duha ka iban pa nga mga utod kag kaabyanan sa ila lugar bangud may birthday.
Apang nag-abot ang amo nga mga tanod kag gin-imbitar ang utod sang biktima nga si Brian bangud nasal-an ini nga amo ang tawo nga ginareklamo nga nagpang-gamo sa ila barangay.
Siling sang iloy sang biktima nga nagpamalibad ang iya bata nga mag-upod sa mga tanod bangud indi man siya ang natungdan nga tawo nga ginareklamo.
Bangud sini, naakig ang mga ginaalegar nga hubog nga tanod kag ginkastigo ang iya bata kag bisan sin-o na lamang nga ila makita nga natabuan sang insidente.
Pahayag sang iloy nga ang natam-an gid kastigo amo ang iya menor de edad nga bata bangud ginlampusan ini sang baseball bat kag naigo gid sa iya bagul.
Ini nga insidente ang padayon na karon nga gina-usisa sang mga katapo sang Police Station 1./dyHB BACOLOD
