Plano karon sa kagamhanang lokal sa Cagayan de Oro nga magmugna og 24/7 nga Mental Help line pinaagi sa Psychosocial Division sa City Social Welfare and Development o CSWD.
Tumong niini nga dunay direktang madoolan ang mga Kagay-anon kabahin sa mga mental health services.
Matud ni Jaymee Leonen, head sa Psychosocial Division nga ang 24/7 Mental Help Line usa ka Inter-Agency Collaboration nga maoy motubag sa mga concerns may kalabutan sa mental health problem.
Dugang tumong niini nga ma-usa sa 911 Rescue Service ang 24/7 Mental Help Line.
Samtang, isip pagpangandam sa maong proyekto, dunay gipahigayong duha ka adlaw nga Mental Health Forum sa mga Violence Against Women desk workers sa matag barangay aron mahatagan og kapasidad ang mga barangay kung unsaon pagdala ug pag-ila sa ilang mga kliyenti nga dunay depression ug uban pang mga mental health problem.
Basi sa listahan sa Psychosocial Division, duna nay 15 ka kaso sa hikog ning syudad gikan sa bulan sa Enero hangtud sa unang semana sa Abril ning tuiga.
Ang maong ihap nakapa-alarma ilabina nga kadaghanan sa mga bikitma mga batan-on ug menor de edad.
Nasuta usab nga depression ang nag-unang hinungdan sa hikog dinhi sa siyudad.
