MANAPLA, NEGROS OCCIDENTAL – Ginabasol sang mga residente ang Bureau of Fire Protection sa paglapta sang sunog sa isa ka merkado sa banwa sang Manapla kaina sang kaagahon.
Suno sa otoridad, 90% sang merkado ang gin-abo sang kalayo sa sulod sang masobra tatlo ka oras.
Sa interview sa pila ka mga market vendors, ginbuyagyag sini nga masobra isa ka oras na matapos nagsugod ang sunog sang nagresponder ang mga bombero nga malapit lang sa merkado.
Sa interview naman kay Manapla fire marshal SFO2 Frankie Guillen, gin-ako sini nga wala nila natalupangdan ang sunog bangud nagakatulog ang tanan nga mga bombero nga naka-duty.
Pahayag ni Guillen nga tawo lang sila nga kinahanglan man magtulog.
Dugang pa niya nga wala man sila ginpukaw sang mga residente rason nga wala man sila makahibalo nga alas-dos pa gali nagsugod ang sunog.
Alas-3:20 na sang kaagahon sang ila nakadtuan ang mga market vendors kag nadugayan pa sila bangud ginahanda pa ang mga firefighting equipment.
Nahibalu-an nga naglab-ot sa P45 million ang balor sang kahalitan sang sunog. /rcsg /Ricky Filoteo photo
