Gipaabot sa Bulua Central School Principal nga si Duque Cagindangan ang mga accomplishments ug mga proyekto nga gihimo sa ilang tunghaan alang sa school year 2018-2019.
Kini atol sa gihimong State of the School Address o SOSA kaganihang mga ala una sa hapon nga gitambongan sa mga magtutudlo, mga ginikanan ug uban pang mga stakeholders.
Matud ni Cagindangan nga grabe ang paningkamot nga gihimo sa mga magtutudlo uban ang pagtabang sa mga ginikanan aron nga mo-excel ang mga estudyante dili lamang sa academic kundili lakip na sa extra curricular activities nga ang uban miabot na sa national level.
Lakip sa mga accomplishments mao ang kahigayonan nga makasalmot sa Palarong Pambansa ang mga estudyante nga mga players sa Volleyball, Dance Sports, Regional Festival of Talents, MTAP, National Schools Press Conference ug daghan pang uban.
Gipasigarbo usab sa Principal ang ilang mga programa nga nagtumong nga daling makabasa ug makasabot ang mga kabataan nga naglakip na sa ilang reading program nga gitawag og Basa ko, kalampusan Ko!
Matud ni Cagindangan nga duna pud silay programa nga nagtabang sa mga dunay mga special needs ug out of school youths nga mao ang ALIVE, Special Education o SPED Class ug Alternative Learning System kon ALS.
Mitabang usab ang Bulua Central School sa programa sa syudad sa Solid Waste Management, pagsegregate sa basura ug pagdili sa paggamit sa cellophane sa pagpalit og tubig diin giaghat ang mga ginikanan nga padalhan og plastic bottles or jar ang ilang mga anak.
Gikalipay sa tunghaan nga dunay mga estudyante sa Grade 6 ang nipasar sa Regional Science High School, private schools, City High School ug Bulua National High School.
Gipahibalo ni Cagindangan ang mga nagpadayon o himoon pang mga proyekto sama sa flood control, herbal garden, school library nga dunay wifi, computers ug uban pa nga planong himoon sa mga alumni, nagpadayon nga pagtukod sa 3-storey building nga dunay 12 ka classrooms nga gilaumang magamit na sa pagbukas sa klase sa Hunyo, functional school clinic ug uban pa.
Naghangyo si Cagindangan sa tanan aron matabangan nga mas mo maayo pa ang performance sa tunghaan pinaagi sa pag-angkon sa zero drop-out rate, taas nga completion rate, zero o ubos nga failure rate ug repetition rate.
Sa katapusan, gipahibalo usab niini nga sa panahon sa bakasyon dunay himoong summer reading camp, training sa dancesports, taekwondo ug uban pa.
