Sarangani News–Plantsado na ang mga giandam nga aktibidad sa Provincial Government sa Sarangani alang sa ika-26 nga foundation anniversary og ika-16 nga MunaTo Festival sa Sarangani Province matigayon sunod semana magsugod Nobyembre 28, Miyerkules, og matapos sa Sabado, Disyembre 1.
Segun ni Ms. Marjorie “Langlang” Purisima, ang tourism officer ni Governor Steve Chiongbian Solon, “Kulay MunaTo” ang tawag sa tema karong tuiga kung diin nag-ila kini sa nagkadaiyang kolor nga anaa sa Sarangani, kolor tungod sa nagkadaiyang kultura, tribu, katawhan, pagtuo, adbokasiya, og sining. Apan managlahi man ang kolor, nagkahiusa, nagtinabangay og nagrespetuanay gihapon ang kadaghanan alang sa kalinaw og kalambuan.
Og kay kasumaran man sa kamugnaan isip probinsya, naka-sentro sa gihapon karong tuiga ang mga aktibidad nga naghatag bili sa kultura og panginabuhi sa mga lumulupyo, sa pag-ayuda nila Senador Manny og Congressman Ruel Pacquiao, Sangguniang Panlalawigan og mga mayores.
Kumpirmado na ang paghidangat nila Senadora Nancy Binay, kanhing DENR Secretary Gina Lopez, ang artista nga si Mr. Robin Padilla, og uban pang personalidad.
Dili malimtan ni Pangulong Rodrigo Duterte ang The Platform, usa sa programa sa MunaTo Festival, tungod kay paghuman sa pag-file sa iyang certificate of candidacy isip presidente atong tuig 2015, oras lang ang pagitan og nisalang dayon kini sa “talk show format” nga The Platform kung diin ang host mao mismo si Governor Solon. Nag-helicopter pa kini gikan sa Davao City.
