Negatibo ang tanan nga mga alkalde sa South Cotabato sa COVID-19, base sa resulta sang ila nga RT-PCR test, matapos nga nakaupod sang mga ini si Koronadal City Mayor Eliordo Ogena sa ginpatigayon nila nga pagsinapol sang nagligad nga semana upod si Governor Reynaldo Tamayo Jr. Ini ang kumpirmasyon ni Surallah Mayor Antonio Bendita, Presidente sang League of Municipalities sa South Cotabato.
Nahibaluan nga nagpositibo sa COVID-19 si Mayor Ogena.
Samtang sa subong suno kay Mayor Bendita nagapabilin sila nga nakaquarantine nga mga alkalde kag ginamonitor ang ila nga kondisyon sa pihak nga negatibo sila sa virus base sa resulta sang ila nga swab test.
Matapos suno pa ang ila nga pagpaidalom sa quarantine sa Lunes nga adlaw.
Pahayag pa ni Mayor Bendita ginhisgutan nila sa nasambit nga pagsinapol ang angot sa pagbakal sang mga LGU`s sa South Cotabato kag provincial government sang COVID-19 vaccine.
Apang nahinayan suno pa sila sa proseso sa pagbakal sang COVID-19 vaccine tungod magaagi pa sa national government ang local government unit.
Suno sa iya may-yara na sila sang gin-alokar nga pondo kapareho sang Surallah nga nagpain sila sang P15 million, apang wala pa sang go signal ang national government nga sarang na nga makabakal ang LGU.
Ginhatagan pa punto sang alkalde nga padayon ang paandam ang COVID-19 sa South Cotabato, apang mahinay ang proseso sa pagbakal sang vaccine.
