TACLOBAN CITY – Mas mahugot nga seguridad an ginpapatuman tinikangan pa kakulop ha probinsya han Southern Leyte tungod han report nga mayada mga armado nga tawo an nakasulod ha bungto han Silago ngan Libagon han mao nga probinsya.
Ginkompirmar naman ini nga report ni Maasin City Police Chief P/Supt. Mark Nalda ha Sunstar Superbalita.
Sumala kan Nalda, ginpa-ilarom na ha “condition orange time” an bug-os nga probinsya han Southern Leyte ha posible nga hulga.
Nakabantay na 24/7 an mga kapulisan.
Verified na an report ngan padayon na an ira imbistigasyon.
Dugang ha pamahayag ni Nalda, nakarawat nira an report antis pa man an pamomba ha Jolo, Sulu dida han dominggo.
Waray naman daw dapat igkahadlok an publiko tungod nga nakaandam an mga kapulisan ngan kasundaluhan ha mao nga probinsya.
Magin mabinantayon an publiko, kun mayada kaduda-duda nga tawo, dayon igreport ha mga kapulisan.
