Nisaka sa kapin kon kulang 600 ka mga indibidwal ang namakwit gikan sa ilang pinuy-anan ngadto sa evacuation center sa Sitio Malapgap, Brgy. Sinanglanan ning siyudad sa Malaybalay.
Sa interview sa RMN Malaybalay ngadto Cpt. Rene Belmonte ang Civil Military Operations Officer ug Spokesperson sa 403rd Infantry Brigade, Philippine Army gibutyag niini nga gikan ang mga bakwit sa mga Sitio Sta. Rita ug San Roque sakop sa mao nga barangay ang napugos sa paghikling tungod sa presensya sa mga New People’s Army kon NPA sa ilang lugar.
Ang mao nga ihap gilangkuban kini sa 167 ka mga pamilya.
Nag-ugat ang mao nga pagbakwit human nga gi-adtuan sa 30 ka miyembro sa mga NPA ang Sitio San Roque niadtong Sabado sa gabie, Mayo 16, 2020 ug pagka-ugma niadto na usab kini sa Sitio Sta. Rita kung asa gi-imbitahan ang mga tawo didto nga mu-apil sa lectures nga himoon sa mao nga grupo.
Nakiglambigit na ang 403rd Brigade sa Local Government Unit sa dakbayan sa Malaybalay para sa posibleng tabang ngadto sa mga pamilyang apektado sa seguridad sa kahapsay ug kalinaw.
Nasayran nga nabalaka ang maong mga katawhan human nga adunay presensya sa matud pa mga NPA sa ilang lugar aron mangayo ug suporta sa pagkaon.
Gidugang ni Cpt. Belmonte nga naghimo na sila ug combat operation sa bukid nga bahin sa maong mga sitio ug sa karon wala pa usay nahitabo nga engkwentro.
