Bacolod City – Suportado ni Presidente Rodrigo Duterte nga i-postpone ang barangay election nga natalana kuntani sa maabot nga bulan sang Oktubre kag ideklarar nga bakante ang tanan nga pwesto
Ini ang ginpahayag ni DILG Secretary Mike Sueno sa iya pagtambong sa ASEAN Summit meeting kahapon diri sa ciudad sang Bacolod
Suno kay Sueno, ang matabo amo nga iga appoint na gid lamang ni PRRD ang mga barangay officials base sa rekomendasyon sang DILG, LGUs kag iban pa nga sector.
Dugang pa ni Sueno nga katuyuan diri ni Pres. Duterte nga matinluan ang pang-gobierno kag dapat magasugod sa barangay level.
Ginapanginwala naman ni Sueno ang issue nga ini ang may kahilabtanan sa plano sang presidente nga pasangkaron kag dugangan ang miembro sang ila partido.
Samtang, daku naman ang posibilidad nga madayon ang SK elections sa maabot nga Oktubre.
Ginarespito naman ni Liga ng mga Barangay President sang Negros Occidental, Provincial Board ex-officio member Annabelle Bermudo kon amu sini ang mangin direksyon sang Duterte administration, apang mas maayo nga may eleksyon para makapili ang tawo sang mga opisyales sang barangay nga ila nagustuhan./dyHB BACOLOD
