General Santos City–Mokabat na ngadto sa 932 ka mga barangay sa rehiyon 12 ang na-deklarang drug cleared sa Philippine Drug Enforcement Agency kon PDEA-12, samtang anaa sa 195 ang nagpabiling apektado pa sa illegal nga droga ug anaa sa 22 ang Un-Affected Barangays.
Sumala kang Kath Abad, tigpamaba sa PDEA-12, ang maong ihap gikan sa 1, 158 ka mga barangay gikan sa upat ka probinsya ug usa ka syudad sa Rehiyon, walay apil ang mga barangay nga anaa sa Cotabato City. Pagpaklaro niya nga bisan ug daghan na ang nadeklarang Drug Cleared sa Rehiyon, gikinahanglan gihapon nga ipa-ilalom sobli sa re-validation tungod sagad sa maong mga barangay tuig 2017 pa sa dihang nadeklarang cleared sa droga.
Dugang niini nga sa karon, duha lang ka barangay ang bag-uhay nga na-deklarang drug cleared. Usa niini ang gikan sa Banga sa South Cotabato, samtang usa ang gikan sa Sto.Niño, South Cotabato. Samtang ang uban matud pa, ginahulat pa para sa re-validation ug re-assessment sa overside committee nga gilangkuban sa PDEA, PNP, LGU, DOH ug DILG.
Tumong niini aron masegurong sakto ang mga dokumento nga i-submitar ug sobling ma-deklara nga drug cleared ang usa ka barangay. Kalabot niini, gibutyag ni Abad nga daghan na ang mga gikinahanglang requirements aron madeklarang drug cleared ang usa ka barangay subay sa bag-ong mando ni PDEA Director General Wilkins Villanueva.
Dili matud pa pareho kaniadto nga pwedeng magpa-enroll lang ang mga drug surrendee sa Community Based Drug Rehabilitation Program ug ma-account ang tanang ihap bisan ug dili maka-graduate. Apan sa karon, kinahanglan nga maka-graduate gyud sa maong programa ayha madeklara nga cleared sa illegal nga droga ang usa ka barangay.(LVR)
