Mga biktima sa landslide sa Tigatto, na-trauma

Davao city – Nakabaton og trauma ang mga residente nga naapektohan sa pagdahili sa yuta dala sa pag-bundak sa kusog nga uwan sa Purok 6, Barangay Tigatto, Buhangin District alas- 10:00 kagabii.

Gibati na og kahadlok ang mga nanimuyo nga mubalik og puyo sa ilang mga balay kay basin masubli ang landslide kung magbundak ang uwan ug madisgrasya na hinoon sila.

Usa si Pamela Pandadagan nga alanganin mubalik sa iyang balay tungod sa kabalaka nga basin matigayon na pod og dahili ang yuta og mabutang sa alanganin ang iyang kinabuhi uban sa iyang anak.


Sigun ni Pandadagan nga hangtud karon wala pa mawala ang iyang kahadlok gumikan sa pagdahili sa yuta ug maayo na lamang gani kay wala matabunan ang ilang balay mao nakagawas sila.

Apan gikaproblemahan lang niini mao ang panginabuhian sanglit parte sa iyang balay nagsilbi nga tinda-han kung asa kini gasandig sa inadlaw-adlaw niyang panginahanglanon.

Ug tungod ani, miapelar kini og tabang sa lokal nga kagamhanan sa karon nga dili siya katinda human na-apektaran sa landslide ang iyang balay kagabii.

RadyoMan Joel Viray

Facebook Comments