General Santos City— Gipaklaro ni Police Chief Superintendent Marcelo Morales, Regional Director sa Police Regional Office 12 nga nagahimo sila ug pamaagi aron nga mabatukan ang mga pagpamusil-patay sa rehiyon.
Sumala niya nga hugot ang direktiba sa tanang mga Chief Of Police nga sulbaron gyud tanang kaso sa ilahang Area Of Responsibility aron mahatagan ug hustisya ang mga biktima.
Pamahayag niini nga nahatagan na usab ug direktiba ang tanang mga hepe sa kapulisan nga higayon nga dili nila matuman ang mga mando gikan sa Regional Headquarters, siguradong sila ang ma-relib gyud sa ilahang pwesto.
Dugang pamahayag ni Gen. Morales nga aduna may mga excuse nga dili ma-relib ang usa ka opisyal hilabi na kung makita nga aduna silay ginahimo aron masulbad ang mga kaso sa ilahang area of responsibility.
Pag-angkon niya nga dili gyud sayon nga masulbad ang mga kaso sa patay hilabina kung walay mutumaw nga testigo o dili makig-alayon ang kabanay.
Apan, aduna usab limitasyon ang ilahang pagsabot gumikan tanang mga biktima bisan unsa pay background niini ang kinahanglan gyud nga mahatagan ug hustisya.
