Preparado na ang mga Comelec Offices sa South Cotabato sa pag-umpisa sang filing sang certificate of candidacy para sa mga politiko nga luyag magpapili sa 2022 local kag national elections .Ini ang kumpirmasyon ni Provincial Election Supervisor Atty. Jay Gerada.
Suno kay Atty. Gerada nainspeksyon naman sang Department of Health ukon IATF ang mga Comelec Offices sa probinsya agud masiguro nga mapatuman ang minimum public health standard sa filing sang COC.
Samtang suno kay Atty. Gerada istrikto nila nga ipatuman ang health protocols, lakip man sa polisiya nga ang pahanugutan lamang nga makasulod sa ila opisina ang aspirant kag isa tubtob duha lang ka watcher ang magsulod kag dapat magpaschedule ang magfile sang COC agud makontrol kag mapatuman ang health protocols.
Paklaro man ni Atty. Gerada nga indi na kinahanglan sa local level ang negative RT-PCR test sang mga magfile sang COC kag sang iban pa.
Magaumpisa ang filing sang COC bwas nga adlaw, Oktubre 1 tubtob sa Oktubre 8 subong nga tuig, lakip na Sabado kag Dominggo nga adlaw.
Bukas man ang mga Comelec Offices suno kay Atty. Gerada alas 8:00 sang aga tubtob alas 5:00 sang hapon.
