Liwat nga ginpahanumdum sa publiko sang Iloilo City Police Office ang mga indi dapat himuon kag dal-on sa mga patyo sa tion sang Piyesta Minatay.
Suno kay ICPO Spokesperson Police Sr. Inspector Shella Mae Sangrines nga hugot nga ginadilian ang pagdala sang armas luthang kag makamamatay nga hinganiban sa sulod sang sementeryo, lakip na ang pagdala sang makahulubog nga ilimnon kag mga baraha.
Ginadilian man suno kay Sangrines ang pagdala sang magahud nga sound system mga patyo.
Ang sin-o man nga madakpan nga magalapas sa nasambit nga pagsulundan ang magapangatubang sang nagakaigo nga kaso.
Ginpanugyan man sang ICPO spokesperson sa publiko nga likawan ang pagdala sang madamo nga kuwarta kag mga alahas sa pagbisita sa mga patyo agud malikawan nga mabiktima sang mga kawatan.
