Magsilbi matud pang ehemplo ang mga elected officials nga nagpailawom sa drug test ngadto sa konstituwenteng ilang gi-alagaran.
Sa interview sa RMN Malaybalay ngadto kang Atty. Nestor Cajes Jr., ang provincial administrator sa Panggagamhanang Probinsyal sa Bukidnon gibutyag niini nga nagpakanaug ug memorandum no. 13 ang PGB nga nag-direkta sa tanang mga elected officials gikan sa Gobernador, Bise- Gobernador, Board Members, Mayores, Bise- Mayores, mga miyembro sa Sangguniang Panlungsod ug Bayan apil na ang mga IP’s representative nga mupailawom sa drug test.
Nasayran nga gihatagan lamang ang maong mga opisyal hangtod Enero 15 ning tuiga aron sa pagpa-drug test.
Matud ni Atty. Cajes nga magsilbi kining ehemplo ngadto sa tanang probinsya ug sa mga katawhan sa Bukidnon aron ilang makita nga seryoso ang panggobyerno sa probinsya sa kampanya kontra illegal nga droga.
Sigun sa provincial administrator nga dili man sila makapahamtang ug sanction kung adunay mga magpositibo apan magsilbi kining giya sa mga bontante kung kinsa ang angay ug dili angay nga botaran panahon sa eleksiyon.
Gidugang pa niini nga wala usay angay nga kahadlukan nga isubmit ang ilang mga kaugalingon sa drug test kung wala kini gitago sa publiko.
Oportunidad usab daw kini nga mapakita sa katawhan nga limpiyo sila samtang naghupot ug public position.
