ILIGAN CITY, PHILIPPINES- Aprubado na ang resolusyon sa Sangguniang Panlungsod sa Iligan nga nagmando sa Iligan Light and Power Incorporated (ILPI) ug mga telecommunication company nga ipahipos ang mga kable sa kuryente ug ang mga gitawag og spaghetti wires nga makit-an sa daplin lamang sa mga dalan sa dakbayan.
Sa maong resolusyon nga giduso ni Konsehal Sol Bacsarpa nakalatid nga tumong niini aron ma-protektahan ang mga kinabuhi ug mga kabtangan sa publiko ug maduso ang mga kalamboan sa siyudad isip usa sa mga dalan aron maangkon ang kahapsay ug kahamugaway sa pagpuyo.
Matud pa ni Bacsarpa nga adunay daghang reklamo ug mga obserbasyon nga naabot kaniya kabahin sa hazard, gawas nga delikado sa publiko ang maong mga “spaghetti wires” dili usab kini maayong tan-awon.
Aron malikayan ang mga aksidente sa umaabot nga adlaw ug aron ma-protektahan ang kinabuhi sa publiko, gipaningkamutan karon ni Bacsarpa nga mahimo na sa ILPI ug sa mga telecommunication companies nga mahipos na ang ilang mga wires ug mga kable.
Sa umaabot nga kasaulogan sa kapistahan sa Iligan sa bulan sa Septembre, gilauman ni Bacsarpa nga mahipos na kini.
