Zamboanga del Sur – Ipailalom sa Enhanced Community Quarantine ang tibook probinsya sa Zamboanga del Sur sugod alas 12 sa udto karong adlawa.
Sa gipagawas ng guidelines kagahapong adlawa, ilalom sa Enhanced Community Quarantine dili angay magpanic buying ang publiko gumikan kay magpabiling abli ang merkado publiko, supermarkets, groceries ug convenience stores, bakeries, mga ospital, medical clinics, mga parmasya ug drug stores.
Lakip sa magpabiling abli mao ang food preparation and delivery services, water refilling stations, mga planta sa mga nanag-unang palaliton, mga bangko ug establisimento sa pera padala o money transfer.
Magapadayon usab sa ilang operasyon ang mga establisimento nga nagtanyag sa serbisyong kuryente, petrolyo kon gasoline stations, water stations ug ingon man ang telecommunication.
Samtang subay sa Sec. 5 sa EO No. 2020-09 nga permado ni Governor Victor Yu, temporaryong ipasirado ang tanang computer shops, peso net, massage parlors, mga resort, motel, hotel, sabungan ug sports facilities. Dugtong niana, isirado usab ang tanang imnanan kon beerhouse ug fitness gym.
Temporaryong ipaundang usab ang mga dula nga adunay close contacts sa players sama sa basketball, volleyball ug uban pang ball games lakip ang billiard ug ang majong.
Subay gihapon sa Sec.5 sa maong kamanduan, gidili na una ang flea market o ang gitawag nga Tabo-tabo.
Ang tanang masakpan nga nakalapas sa maong kamanduan posibleng mapasakaan sa tukmang kaso.
Awhag sa kagamhanang probinsyal ngadto sa publiko, magpabiling kalmado.
