Mga hungihong nga zombie attack sa Bukidnon, gitin-aw sa kapulisan

Giklaro karon sa Valencia City Police Station ang mga hungihong kabahin sa gikaingong “Zombie Attack” sa Tungan-tungan Village sa Valencia City nga usa lang kini ka talagsaong insidente sa Physical Assault ug dili tinood ang mikatag sa social media nga pang-atake sa zombie.

Sumala kay Lt. Pablo Jugos Jr., Chief Investigator sa Valencia City PNP, ang insidente nga nahitabo adtong Pebrero 17 usa lang ka talagsaong kaso sa physical assault nga gilangkuban sa duha ka mga lalaki.

Giila ni Jugos ang suspek nga si Carl Clinton Colinas, 25 anyos, ug mulopyo sa Saligan village, nga gikaingong nanakit sa biktima nga si Anthony Arimas, 30 anyos, ug mulopyo sa Tungan-tungan village.

Gatoo ang imbestigador nga nag-viral sa social media ang insidente tungod kay gawas sa pagpanakit, gitusok usab sa suspek ang mga mata sa biktima gamit ang iyang mga kamot, gidukdok ang kamot niini, ug gisuyop pa gayud ang dugo.

Panghimangnu ni Jugos nga dili basta-basta magtoo sa mga hungihong ilabi na sa social media ug sutaon usa ang kamatooran.