General Santos City–Mukabat na sa kapin 10 ka mga Investment Scheme nga naga-operate sa Gensan ang gireklamo sa buhatan sa NBI-SARDO sa pagkakaron, kini ang gikumperma ni NBI Investigator Jepoy Mosquida.
Sumala niini nga ang maong mga Investment Scheme mao ang PPM, KAPA, Alamcco, Shantal, Pris-CI, Millionaires Club, Take 5, Gold Skin, Golden Bar B ug NMC.
Ang maong mga investment Scheme mao kadtong mga nabugkag na o naundang na ang operasyon kansa napakyas sa paghatag ug payout ngadto sa ilang mga investors.
Pinakauwahing Investment Scheme nga gireklamo sa buhatan sa NBI mao ang NMC.
Naidtong nakalabayng adlaw, nagtapok ang mga investors niini ngadto sa buhatan sa NBI aron kini ireklamo human nga wala na sila nakapay-out sukad niadtong June 20.
Samtang gibutyag pa ni Mosqueda nga ubang mga investment scheme nga gireklamo kanila ang wala nila namonitor gumikan tago-tago ang ilang operasyon. Ila nalang nasayran ang maong mga investment Scheme dihang duna nay mireklamo sa ilang buhatan.
Dugang pagbutyag ni Mosqueda, sa PPM palang anaa sa 1.9 billion nga kantidad sa kwarta ang nawagtang gikan sa mga investors.
Samtang sa laing mga investment scheme base sa ilang record anaa sa kapin 400 million pesos ang nawagtang sa mga investors nga mireklamo sa ilang buhatan.
Wala pay labot niini ang mga investors nga wala pa nahidangat sa buhatan sa NBI.
