Iloilo City- Pagahatagan sang tatlo ka bulan nga plaso ang mga food establishments sa Iloilo City antes ipatuman ang half cup rice ordinance.
Suno kay City Councilor Ely Estante, ini agud mahatagan sang tion ang mga kalan-an nga i-reprogram ang ila system sa pagdugang sang half cup rice order sa ila menu list.
Dugang pa ni Estante, nagakadapat nga magbutang sang mga signage ang mga kalan-an agud makahibalo ang publiko nga naga-offer na ang mga ini sang half cup rice.
Ginklaro man ni Estante nga indi na kinahanglan mag-order sang 1 cup rice antes maka-order sang half cup rice bangud mahimo na ini mangin 1st order sang mga gamay lang magkaon.
Samtang, ang magabayolar sa nasambit nga ordinansa, makabaton sang warning sa 1st offense, magamulta sang 3 mil pesos sa 2nd offense kag 5 mil pesos nga multa kag suspension ukon cancellation of business permit sa 3rd offense.
Madumduman nga napasar na kahapon sa City Council ang half cup rice ordinance nga nagahatag sang option sa mga gamay lang magkaon sang kan-on nga mag-order sang half cup rice.
