Bukidnon – Gipamugos sa Armed Forces of the Philippines nga nahatag na sa gobyerno ang halos tanang gipangayo sa CPP NPA NDF apan gamay lamang ang gipangayo sa panggagamhanan nga wala niini natuman.
Sa interview sa RMN Malaybalay ngadto kang AFP Spokesperson B/Gen. Restituto Padilla gibutyag niini nga apil sa ilang gipangayo sa mga NPA ang pagpahunong sa extortion kon pagpangilkil ug pagpanunog sa mga kompanyang dili muhatag sa *rebolusyonary* tax.
Matud pa niya nga angayang hinumduman nga ang mas apektado sa mga pagpangatake sa NPA mao ang katawhan.
Apil na niini ang gihimong pagpangatake sa mga proyekto sa gobyerno sama sa farm to market road diin ang publiko maoy makapahimulos.
Gidugang pa ni Padilla nga dili na idolohiya ang gibarugan sa mga NPA kon dili kadalo.
Samtang nidepensa usab ang New Peopls Army –North Central Mindanao Region kon NPA-NCMR atol sa interview sa RMN sa pag-ingon nga ang ilang pagpangtake nga ilang gihimo agig pagsupak sa gideklarang martial law sa Mindanao.
Matud ni Ka Malem Mabini ang spokesperson sa NPA-NCMR nga dili tubag ang martial law sa krisis nga nasinatian karon.
Sigun niya nga ang pagpadayon sa hisgutanang pangkalinaw maoy dalan aron matubag sa gobyerno ang dugay nang gipangandoy sa katawhan nga hustisya ug ka-angayan.
