Nakighiusa ang Commission on Elections (Comelec) sa mga kandidato sa 2019 midterm elections sa gihimong unity walk sa dakbayan sa Malaybalay kagahapon sa buntag para ipanawagan ang malinawong pagpahigayon sa piniliay karong Mayo.
Nasayran nga gipanunahan sa Bukidnon Provincial Police Office ang Unity Walk dungan sa inter-faith prayer rally ug peace covenant signing sa Freedom Park, Barangay 4 ning dakbayan. Gitambungan kini sa mga magpapili sa provincial ug city position.
Samtang opisyal nang nagsugod ang election period alang sa 2019 May midterm elections.
Sa interview sa RMN ngadto kang Atty. Chubasco Caiña, ang city election officer sa Malaybalay gibutyag niini nga apil sa mga “prohibited acts” ang pagbalhin sa mga opisyal ug empleyado nga anaa sa civil service; pagdala o pagbiyahe sa mga armas ug mga deadly weapon gawas kung adunay pagtugot sa Comelec; paggamit sa mga security personnel o bodyguard sa mga kandidato.
Dungan niini gibutyag ni Atty. Caiña nga preparado na sila alang sa May 13 national and local elections.
