Mas gipahugtan pa ang pagbantay sa mga quarantine site sa mga entry points sa Probinsya sa Bukidnon batok sa hulga sa African Swine Fever kon ASF.
Sa interview sa RMN Malaybalay ngadto kang Bukidnon Provincial Administrator Atty. Jay Albarece gibutyag niini nga dili angayang magkompiyansa ang probinsya sa ASF tungod kay naa nay kumpirmado sa ASF ilabina sa Davao area.
Dako matud pa kini ug epekto sa hog industry sa Bukidnon kung makasulod ang maong klase sa sakit sa mga baboy ilabina ug daghan ang nagsalig sa mao nga industriya.
Matud ni Atty. Albarece nga mas gi-istrikto na ang pagpatuman sa kwarintinas sa mga boundaries sa lalawigan.
Gani daw ang Bukidnon ang adunay usa sa pinaka-istriktong nagpatuman sa quarantine sa tibook Pilipinas.
Matag karon ug unya usab daw nakamonitor ang DILG sa local government unit kon nasunod ba ang mga checklist nga angayang tumanon sa pagprotekta sa Bukidnon gikan sa ASF.
