Labangan, Zambonga del Sur – Kabahin sa paghandum sa Earth Day, usa ka oras nga gibaklay sa mga miyembro sa Kapisanan ng mga Broadcaster sa Pililipinas ( KBP-Zamboanga del Sur Chapter) ang baybayon nga sakop sa Brgy.Old Labangan, Labangan, Zamboanga del Sur aron pagtanum sa mga bakhaw.
Gipangunahan ni RMN DXPR Station Manager ug KBP Zamboanga del Sur Chairman Melchor Coronel ang paglakaw sa kapin 30 ka mga magsisibya diin kauban usab ang mga personahe sa Department of Environment and Natural Resources (DENR) ug Philippine Information Agency nga nisalmot usab sa kalihukan sa Earth Day.
Ang kabakhawan usa sa labing epektibo nga pagpanalipud sa mga komunidad nga naa sa mga lapyahan ug baybay, pagpasabot sa mga tinugyanan sa DENR una gihimo ang pagpananom.
Naobserbahan usab sa RMN DXPR Newsteam nga ang mga kabakhawan ug katunggan nga niturok na sa lugar dako og kapasidad pagsagang sa mga basura nga makalahos sa kadagatan kay daghanang mga basura ang nangasalay sa sanga sa bakhaw sa maong dapit.
