General Santos City–Padayon ang ginahimo nga contact tracing sa Brgy. Bula human magpositbo ang ikaduhang residente niini sa covid 19 nga usa ka 58 anyos nga lalaki.
Sumala kang kapitan Nicanora Vargas, nga subay sa insiyal nga impormasyon, nitambong sa lamay ang nasangpit sa may Sitio Royeca niadtong petsa 10 ug petsa 11 sa Agusto, petsa 12 dihang nadigangat kini sa Gensan Fishport, petsa 13 dihang mibisita kini sa iyang mga Paryente sa Datal Bulol, Glan, Sarangani Province, petsa 14 nibalik kini sa Gensan, diin nakasinati na ug pagpanakit sa iyang ulo ang pasyente, petsa 16 nahidangat pa sa Zone 4, Barangay Bula ang maong pasyente ayha kini nagpaadmitar sa ospital gumikan dili na maayo ang iyang pamati. Petsa 18 dihang gi-tagged kini isip suspek sa Covid-19.
Petsa 19 dihang gipailawom sa swab test ang nasangpit ug dihang migula ang resulta, positibo kini sa Covid.
Dugang pamahayag ni Kapitan Vargas nga anaa sa upat ka mga purok ang ilahang gi-lockdown lakip na ang zone 7 ug ang Gensan Ville kung asa adunay mga street ang gibawalan gyud nga muagawas.
Pagpaklaro niya nga bisan ang mga essential worker ang wala una gitugutan nga makagawas samtang padayon ang ginahimo nga contact tracing.
Dili pa usab niya masulti kung hangtud kanus-a magpabilin ang implementasyon sa lockdown gumikan ilaha pang gina-obserbaran ang dagan sa sitwasyon.
Samtang sa naunang 62 anyos nga babaye nga nagpositbo nga taga Zone 7, gibutyag ni Kapitan Vargas nga anaa sa 19 ang direct contact nga ilahang na-trace samtang anaa sa 59 ang 2nd level.
Sa karon, padayon pa sila nga nagapahigayon ug contact tracing para sa 3rd ug 4th level. Ilaha pa usab ginasuta kung aduna ba gyud kini travel history ug kung asa niya nakuha ang virus.
Nanawagan man usab siya sa mga residente sa Barangay Bula nga kung mamahimo sundon ang tanang protocol aron malikayan ang virus ug kung mamahimo likayan una ang paggawas sa balay.(LVR)
