Valencia City, Bukidnon – Gihatagan sa duha ka opsiyon ang mga motorista kung madakpan kini sa gipahugtan nga kampanya sa City Traffic Management Center kon CTMC Valencia batok sa mga modified muffler sa mga motor.
Sa interview sa RMN Malaybalay ngadto kang Cpt. Alejandro Larosa ang hepe sa CTMC-Valencia gibutyag ninii nga ang sistema sa ilang pagpanakop nga hatagan ug duha ka opsiyon ang drayber.
Ang una mao nga isyuhan ug Temporary Operator’s Permit kon TOP sa Land Transportation Office kon LTO.
Ikaduha mao nga tangtangon sa tag iya ang iyang tambutso ug pipi-on kon masohon aron dili na magamit.
Matud ni Larosa nga daghan usab daw ang mas gipili nga tangtangon diha-diha atol sa pagkadakop kaysa isyuhan ug TOP na adunay multa nga 5,000 ug madugang pa ang violation kon kasupakan sa balaod trapiko.
Una nang gidepensa sa CTMC ang hinungdan nganong mismo ang tag-iya mao ang ilang ipamaso ug ipagabas sa ilang tambutso sa motor.
Gipasabot niini nga ilang gilakayan ang isyu nga ilang e-recycle ang mga nakumpiskang tambutso.
Nasayran nga muabot na sa halos 500 ka mga open pipe muffler ang nakumpiska sa mga law enforcers human nag gisugdan ang mao nga hugot nga kampanya sa maong dakbayan.
