Malaybalay City, Bukidnon – Subling gipasibaw sa Department of Social Welfare and Development kon DSWD Region 10 ang mga katungod sa kabataan.
Ang pahinumdom sa DSWD 10 alayon sa pagsaulog sa National Children’s Month karong bulana sa Nobyembre.
Sa interview sa RMN Malaybalay ngadto kang Charmaine Tadlas, ang information officer sa DSWD Region 10 gibutyag niini nga apil sa mga katungod sa kabataan mao ang pagbaton ug pangalan.
Matud ni Tadlas nga adunay pipila ka kaso nga mga batang gipang-abandona sa ilang inahan ug makit-an ug iturn-over ngadto sa DSWD ug ila kining hatagan ug kaugalingong pangalan.
Sigun niini nga katungod usab sa mga kabataan nga adunay pamilya, maong kung adunay gipang-abandona nga bata nga anaa sa ilang buhatan, ila kining gipangitaan ug pamilya pinaagi sa adoption.
Gidugang usab sa DSWD nga adunay katungod usab ang mga bata nga makatungha.
Nagpahimangno si Tadlas nga mag-atubang ug kaso ang mga ginikanan kung dili pamatungha ang ilang mga anak. Aduna na matud pa karoy mga libreng tulunghaan.
Gihatagan usab ug pagtagad niini nga kung maka-skwela ang mga bata malikay kini sa child labor ug ubang pang risgo.
Gibutyag usab ninii nga katungod usab sa mga bata ang makadula ug dili lang puro trabaho.
Gisiguro usab ni Tadlas nga andam nga protektahan sa gobyerno ang mga katungod sa mga kabatan-unan.
