Mga naglangkob sa Local Price Monitoring sa Surigao City nagtigom sa pagtuki sa kamahal sa presyo sa isda ug iban na seafood products suyod sa merkado
Human tagpaabot an reklamo nan pipila ka konsumante kabahin sa kamahal sa presyo sa isda ug iban na seafood products suyod sa merkado publiko, nagtigom kahapon an mga naglangkob sa Local Price Monitoring Committee sa pagpanguna nan City Agriculturist Isias Elumba kaiban Market Supervisor Albert Lustiva ug an Presidente sa Fish Section na si Adelo Lopez sanan mga kaibanan.
Sa amo na tigom, tag-angkon ni Lustiva na mainiton na tagtuki an mahal na presyo pareho sa nokos sigarilyo miabot sa P400-500 kada kilo, bariles P400 an kilo, salindato P300 an kilo, bulis P200 ug iban pa. Mipadayag nan rason an mga mamaligyaay na an kamahal sa presyo resulta kay mahal daan an ila pagkompra sa pag-abot ra sa Fish Landing pa, lakip na padajon na may amihan ugsa gamay ra an nanagat.
Nauyunan sa tigom an pagkab-ot nan Win-win Solution pinaagi sa pag-adjust nan mga mamaligyaay sa ila presyo sa isda ug iban na produkto, may mga mipakubos hangtud P50. Ini na an mga nasabutan na presyo; an nokos sigarilyo mamahimo na P350 kada kilo, bariles P400 ra gihapon an kilo, langug P350, tanguige P350, batagon ug salindato P240, bulis P180, mol-mol tag- P140 sanan hawol2x P160 kada kilo.
Dugang pa na lakang na himoon para mapakgang an sobra na pagmahal sa isda ug iban na produkto an paglibot-libot kada adlaw sa merkado nan 4 ka personahe gikan sa City Agriculture Office ug laing 2 gikan sa Market Office na kon diin an masakpan na waya mosunod sa ordinansa sa price ceiling an mapahamtangan nan multa lakip an pagwaya sa permit sa pagbaligya suyod sa Surigao City Public Market.
