Sominot, Zamboanga del Sur – Usa patay samtang laing tulo ang samaran sa nahitabong pag-pangambush alas 5:10 kagahapon sa hapon didtong dapita sa Purok 3, Barangay Barubuhan, Sominot, Zamboanga del Sur.
Giila ang biktima nga sila si SANTIAGO MIÑOSA, 58 anyos mokandidato matud pa ubos alang sa Barangay ug SK Elections ilalom PDP-Laban, ENRICO ESTRADA, 54 anyos , LGU Casual Employee, residente sa Purok Irene, Barangay Poblacion, CARLITO MURCIA, 44 anyos, LGU Casual Employee, taga Purok Waling-waling, Barangay Poblacion sa maong lungsod.
Samtang patay ang biktima nga nailang si ROLANDO LABAD, 53 anyos kanhi miyembro sa CAFGU ug Casual Employee sa LGU Sominot nga nakahi-agum sa daghang samad pinusilan sa lawas. .
Sa inisyal nga imbestigasyon sa kapulisan nasayran nga sakay ang mga biktima sa managsunod nga motorsiklo gikan sa Barangay Poblacion paingon sa balay ni Miñoza, apan giatangan kini sa wala mailang armadong kalalakin-an og sa walay langan nga giupaulanan sa bala.
Human sa pagpamusil ang mag suspek daling nisibat sa paingon sa langob sa Barangay Waling-Waling partikyular sa Sitio Puting Bato, nga sakop ra usab sa naasoy nga minisipalidad.
Sumala sa mga naluwas, naila nila ang mga responsable apan nihangyo sa kapulisan nga dili una ibutyag ang mga pangalan.
Nakuha sa dapit nahitabuan ang 42 ka bala , laing duha ka buhing bala M-16 ug duha ka basiyo sa calibre .45 nga pistola.
Bangi sa natad sa politika ang gituohan nga motibo sa maong pagpangambush.
