Ginpaidalom na sa orientation ang mga nahired nga contact tracers dire sa rehiyon sang Department of Interior and Local Government ukon DILG 12.
May-angot sini, yara sa 620 ka mga trainees nga nahired sang ahensya nga nalakip sa 1st batch sang contact tracers nga halin sa probinsya sang Sultan Kudarat, Sarangani, Gen. Santos City kag Cotabato City ang napaidalom sa initial screening process nga kabahin sang ginpatigayon nga virtual pre-deployment Training Orientation sang Setyembre 29.
Kadungan sang nasambit nga aktibidad nakabaton man ang DILG 12 sang donasyon nga mga hygiene kits halin sa opisina ni Deputy Speaker for Mindanao kag 2nd District Congressman Ferdinand L. Hernandez para sa masobra 1,500 ka mga contact tracers sa rehiyon.
Suno kay DILG 12 Regional Supply and concurrent Planning Officer Muhammad Farzieh Abutazil nagalab-ot sa 1,515 hygiene kits ang ila nga nabaton.
Ginpahayag naman ni DILG 12 RD Josephine Leysa nga napanahon suno pa ang nabaton nga donasyon tungod daku ang mabulig sini sa ahensya ilabi na sa mga contact tracers nga ideploy sa mga nagkalain-lain nga lugar sa rehiyon.
Samtang sang Setyembre 30 ginpaidalom man sa virtual orientation ang 2nd batch sang mga contact tracers nga yara sa 851 nga halin naman sa Cotabato Province kag South Cotabato.
Ang mga ini suno pa sa regional director ang magaserbi nga miyembro sang Contact Tracing Teams (CTT) sa sulod sang tatlo ka bulan.
Paklaro pa ni RD Leysa nga yara lang kuntani sa 1,451 slots ka mga contract tracers ang i-hire sa rehiyon , apang tungod sa sitwasyon nga may-yara sang local transmission nadugangan ini sang 50 ka slots.
May-angot sini, sa nangin mensahe ni Dir. Leysa sa mga trainees ginhatagan sini punto nga paagi sa epektibo nga contact tracing magaresulta ini sang ginahandom sang tanan nga mangin Covid-19-free sa masunod nga inadlaw ang rehiyon ilabi na nga pasulod na ang Christmas season
