Kapin sa 11 ka mga indibidwal sa Hda. Carmen, Barangay Daga, Cadiz City ang natumod nga nakahalubilo sang 63-anyos nga lalaki nga nagpositibo sa COVID-19 sa Vallehermoso, Negros Oriental.
Sa interview sang DYHB kay Cadiz City Mayor Salvador Escalante, ginpahayag sini nga ipaidalom na sa swab test subong nga adlaw ang 11 ka mga indibidwal.
Suno kay Mayor Escalante, may upod pa ang 63-anyos nga nagkadto man sa Hda. Carmen kag pareho sila nga nagpamanday sa ila mga himata, apang indi pareho nga balay ang ila nga gintiniran.
Lakip na sa mga natumod sang Cadiz nga nakahalubilo sang pasyente amo ang driver sang ginsakyan sini nga traysikol sang nagbiya ini sa Hda. Carmen kag nagpadulong sa Ceres terminal, kag suno kay Mayor Escalante, ila naman ini usisaon.
Madumduman nga nagkadto sa iya sa mga himata ang 63-anyos sang Marso 15, 2020 kag nagpauli ini sa Vallehermoso sang Mayo 19.
Suno pa sa alkalde, posible man nga ipaidalom na sa swab test bwas nga adlaw ang upod sang 63-anyos.
[image: image.png]
