Mga nakumpiskar nga sinako sang ammonium nitrate sa Culasi Port, ginturn-over na sa Roxas City PNP

Roxas City, Capiz – Nagalab-ot sa 637 ka sako sang mga abono ukon Ammonium Nitrate ang narekober sang mga katapo sang Philippine Coast Guard gikan sa aluminum closed van sang nakaligad nga adlaw matapos ang ginpatigayon nga inspection sa mga cargo sang MV Starlite Saturn sa Culasi port.

Ang nasambitan nga closed van ang ginapanag-iyahan ni Gilbert Jocson sang Estancia, Iloilo kag ginamaneho naman ni Rommy Manaleg y Toribio sang Brgy Pani-an, Estancia, Iloilo.
Ginabanta nga nagalab-ot sa 16, 000 ka kilo ang nasambitan nga mga abono kag nagabalor sang indi magnubo sa 4.7 million pesos.
May posibilidad nga magapangatubang sang kaso ang driver kag tag-iya sang closed van nga ginkargahan sang mga narekober nga ammonium nitrate sa Culasi Port makaligad nga napaslawan ang mga ini nga makapakita sang papeles kaangay sang permit to transport sang nasambitan nga kontrabando.

Sa subong yara na sa paghinakop sang kapulisan ang 637 ka sako sang narekober nga ammonium nitrate.


Facebook Comments