Mga illegal quarrying operations sa pila ka bahin sang ikatatlo nga distrito sang probinsya ang isa sa nakita nga rason sa posible pagluntad sang malapnagon nga baha sa Northern Negros sa una nga bahin sang Enero, 2021.
Ini ang initial nga assessment ni Office of Civil Defense Regional Office -6 Regional Director Jose Roberto Nunez sa interview sang DYHB angut sa ginpatigayon nga aerial rapid assessment sini nga aga, January 15, 2021.
Suno kay Nunez nga sa amo nga aerial survey, nakita nga madamo sang mga ginpabay-an nga quarrying materials nagaharang sa alagyan ukon waterways rason nga ini ang naga-tuga sang obstruction sa mga suba gani nagaluntad ang baha.
Ginpahayag ni Nunez nga ang pinakamaayo nga himuon amo nga ang mga LGUs (nga amo ang nagahatag sang clearance sa mga quarry operations) ang dapat liwat nga i-check ang permiso sang mga operators sini.
Lakip pa sa nakita nga posible ginatunaan sang baha amo ang wala nakaayo nga drainage system kag indi estrikto nga pagpatuman sang waste management program.
Angut sini, bilang solusyon, ginapanugyan ni Nunez ang pagtigayon sang integrated river basin rehabilitation, partikular ang pagpatigayon sang master plan agud makaayo ang mga water exits.
Ginapanugyan man ni Nunez ang pag-upgrade sang mga drainage system sang tagsa ka mga apektado nga LGUs pag-adopt sang integrated nga waste management program partikular ang napabay-an nga segregation sang basura.
[image: image.png]
