Nagsaka na sa 15 ang mga napatay sa trahedya sa kadagatan sang Iloilo kag Guimaras subong nga adlaw , Agosto 3, nga ginalakipan sang MB Chi-chi, MB Keziah kag MB Jenny Vince.
Base sa pinakaulihi nga report, may lima ka napatay sa Iloilo Saint Paul’s Hospital, Isa sa WVSU Medical Center, Isa sa Western Visayas, Medical Center, duha sa Iloilo Doctor’s Hospital, lima sa McClain Hospital sa Buenavista, Guimaras, kag Isa sa Guimaras Provincial Hospital.
Nahibaluan nga mga alas 12:15 kaina sang udto sang magbiyahe gikan sa Parola wharf ang MB chi-chi pakadto sa Jordan, Guimaras sakay ang 43 ka pasahero kag apat ka crew samtang nagsunod man ang MB keziah nga may apat ka crew nga sakay.
Samtang yara sa tunga sang Iloilo-Guimaras strait, ginhampak ang ini sang dalagku nga balud sang magbaskog ang ulan kag hangin kabangdanan nga nagkulob ang duha ka pumpboat.
Pasado naman alas 3 sang hapon sang magbiyahe ang MB Jenny Vince halin sa Buenavista. Guimaras pakadto sa Parola wharf apang ginhampak man sang pugada samtang yara sa lawod kabangdanan nga nagkulob man ini.
Sakay sang MB Jenny Vince ang 36 ka mga pasahero kag apat ka crew.
