Yara na sa luwas nga kahimtangan ang anum tanan ka mga suldado nga napilasan sa ambush sa barangay Pangilihan, Janiuay sang nakaligad nga gab-i.
Suno kay Lt. Col. John Magbalot, commander sang 61st Infantry Battalion nga luwas na sa katalagman si Corporal Ronald Peligro, 34 anyos sang Bohol nga naigo sang shrapnel sa iya guya matapos ginpalukpan ang tropa sang improvised explosive device ukon EID sang ginapatihan mga miyembro sang New Peoples Army.
Nahibaluan nga magluwas kay Cpl. Peligro, pilason man ang lima pa ka mga suldado nga sandayPFC Joebert Porras, 26, sang Barangay Lonoy, Calinog; Cpl Remo Londo Villa, 36, sang Mambusao, Capiz; PFC Peter Calugas, 24, sang Tagsing, Leon; Sgt William Biado Jr, 39, sang Midsayap, North Cotabato; kag PFC Ariel Ea, 24, sang Sultan Kudarat.
Samtang, nagapati si Magbalot nga posible nagbalos ang mga rebelde matapos tatlo sa mga katapo nila ang napilasan sa nagluntad man nga engkuwentro sa barangay Canawilihan, Janiuay pila ka semana na ang nakaligad.
