PALO, LEYTE – Ginpresenta han Police Regional Office 8 an mga nakumpiska nga mga gamit ha illegal nga pangutod hin kahoy ngan pangisda nga resulta han mas ginpakusog nga kampanya han mga kapulisan ha pag-protektar ha kalibungan.
Magkadurudilain nga mga kagamitan sugad han mga gudti nga fishing nets, dinamita, coco lumber, chainsaw, ngan iba pa nga klase hin destructive machines ngan conveyances.
Matapos ig-presenta ha media, ini in nga dayon nga gindistroso.
Sumala kan PRO8 Regional Director PCSupt. Gilberto Cruz nga ha luyo han mga nagpapadayon nga mga operasyon han mga kapulisan in damo la gihapon nga mga mulopyo ha Rehiyon an diri nahadlok ngan nagpapadayon la gihapon ha pagbuhat hin mga illegal nga buruhaton kontra ha kalibungan.
Dugang pa han opisyal, mahitungod nga kadam-an ha mga nadadakop in diri maaram nga illegal an ira ginbubuhat in kinahanglan hira ma-edukar hin sakto.
Ha datos han Police Regional Office 8 ha illegal logging tinikangan dida han Hulyo 1, 2016 tubtob Abril 11, 2018, umabot na ha P17.8M nga kantidad hin kahoy an nakumpiska ha ginbuhat nga 531 nga operasyon, 376 an naaresto, 189 nga kaso an na-irefer ha DENR, 259 an case closed ngan 65 an napasakahan na hin kaso ha korte.
Ha illegal naman nga pangisda, umabot na ha P153.2M an kantidad han mga materyales nga nakompiska tikang ha 904 nga ginbuhat nga operasyon, 690 an may penalidad ha magkadurudilain nga mga bungto, 12 an under investigation, 110 an kaso nga ginrefer ha BFAR, ngan 92 na an na file ha korte.
