Sarangani Province—Nakalitok og “Wow Sarangani” ang mga bisita nga nidayo pa gikan sa kauluhang Maynila human nga ila mismong personal nakita ang libuan ka mga migratory raptors sa kawanangan sa Raptor Hill sa Barangay Rio del Pilar lungsod sa Glan niaging adlaw nga Byernes atol sa natigayon nga labing una nga Raptor Watch Festival dili ra sa Sarangani Province kundili sa tibuok Visayas og Mindanao.
Segun ni Ms. Carmela Balcazar, bird enthusiast nga taga-Quezon Province og myembro sa grupo gitawag nga “Birders Without Borders,” sa ilang lugar sa Luzon may makita kining tag-usa, tag-pito ka mga migratory raptor apan sukwahi matud pa sa Sarangani Province nga libuan ang mga nagpanon nga mga BANOG, muitum pa usahay ang kalangitan inig muagi na ang nanglupad nga mga langyaw nga banog.
Nibilib kini sa sinsiridad nga gipakita sa lokal nga gobyerno nga ma-protektahan ang kinaiyahan og sa hugot nga pagsuporta sa raptor watch festival pinaagi sa Sulong Kalikasan program ni Governor Steve Chiongbian Solon.
Nakita sa mga taga-Luzon ang kalipay sa daghang mga tao, kabataan og empleyado sa gobyerno nga nananum og 2,500 kabuok seedlings atong adlaw nga Byernes bisan sa kalayo na sa gitamnan nga lima (5) ka ektarya nga luna sulod sa Mount Taltak, ang usa sa mga roosting site nga nahimutang sa kabukirang bahin tunga-tunga sa Rio del Pilar og Barangay Batulaki, Glan, Sarangani Province.
